Jaun Elia (syed Muhammad Taqi )

[Just_Like_Roze]

ہے فصیلیں اٹھا رہا مجھ میں
جانے یہ کون آ رہا مجھ میں


جون مجھ کو جلا وطن کر کے
وہ مرے بِن بھلا رہا مجھ میں


مجھ سے اُس کو رہی تلاشِ امید
سو بہت دن چھپا رہا مجھ میں


تھا قیامت سکوت کا آشوب
حشر سا اک بپا رہا مجھ میں


پسِ پردہ کوئی نہ تھا پھر بھی
ایک پردہ کھِنچا رہا مجھ میں


مجھ میں آ کے گرا تھا اک زخمی
جانے کب تک پڑا رہا مجھ میں


اتنا خالی تھا اندروں میرا
کچھ دنوں تو خدا رہا مجھ میں​

 

[Just_Like_Roze]

ہر خراشِ نفس ، لکھے جاؤں
بس لکھے جاؤں ، بس لکھے جاؤں

ہجر کی تیرگی میں روک کے سانس
روشنی کے برس لکھے جاؤں

اُن بسی بستیوں کا سارا لکھا
ڈھول کے پیش و نظر پس لکھے جاؤں

مجھ ہوس ناک سے ہے شرط کہ میں
بے حسی کی ہوس لکھے جاؤں


ہے جہاں تک خیال کی پرواز
میں وہاں تک قفس لکھے جاؤں


ہیں خس و خارِ دید ، رنگ کے رنگ
رنگ پر خارو خس لکھے جاؤں​

 

[Just_Like_Roze]

فراق کیا ہے اگر ، یادِ یار دل میں رہے
خزاں سے کچھ نہیں ہوتا ، بہار دل میں رہے


گزار روز و شبِ وصل اک نگار کے ساتھ
وہ ہے ایک شبِ انتظار ،دل میں رہے


تو اپنی ذات کے باہر نہ بکھریو زنہار
فضا کو صاف رکھیو ، غبار دل میں رہے


نہ ہو اگر نہیں دیوار ہائے نقش و نگار
خیالِ پرتوِ نقش و نگار ، دل میں رہے


لبوں کا یہ ہے کہ رشتہ سبھی سے ہے انکا
بنے نہ جس سے لبوں کی وہ خار دل میں رہے


تو بیچ دے سرِ بازار ہوش دل اپنا
ہو اک خیال جو دیوانہ وار دل میں رہے​

 

[Just_Like_Roze]

تم ہو جاناں شباب و حسن کی آگ
آگ کی طرح اپنی انچ میں گم
پھر مرے بازوں پہ جھُک آئیں
لو مجھے اب جلا ہی ڈالو تم​

 

[Just_Like_Roze]

آپ کی تلخ نوائی کی ضرورت ہی نہیں
میں تو ہر وقت ہی مایوسِ کرم رہتا ہوں
آپ سے مجھ کو ہے اک نسبتِ احساسِ لطیف
لوگ کہتے ہیں ، مگر میں تو نہیں کہتا ہوں​

 

[Just_Like_Roze]

کون سا قافلہ ہے یہ ، جس کے جرس کا ہے یہ شور
میں تو نڈھال ہو گیا ، ہم تو نڈھال ہو گئے


خار بہ خار گل بہ گل فصل بہار آ گئی
فصل بہار آ گئی ، زخم بحال ہو گئے


شور اٹھا مگر تجھے لذت گوش تو ملی
خوں بہا مگر ترے ہاتھ تو لال ہو گئے


ہم نفسان وضع دار ، مستمعان برد بار
ھم تو تمہارے واسطے ایک وبال ہو گئے


جون کرو گے کب تلک اپنا مثالیہ تلاش
اب کئی ہجر ہو چکے اب کئی سال ہو گئے​

 

[Just_Like_Roze]

ہے ضرورت بہت توجّہ کی
یاد آؤ تو کم نہ یاد آؤ
چاہیے مجھ کو جان و دل کا سکوں
میرے حق میں‌عذاب بن جاؤ​

 

[Just_Like_Roze]

بزم سے جب نگار اٹھتا ہے
میرے دل سے غبار اٹھتا ہے


میں جو بیٹھا ہوں تو وہ خوش قامت
دیکھ لو! بار بار اٹھتا ہے


تیری صورت کو دیکھ کر مری جاں
خود بخود دل میں پیار اٹھتا ہے


اس کی گُل گشت سے روش بہ روش
رنگ ہی رنگ یار اٹھتا ہے


تیرے جاتے ہی اس خرابے سے
شورِ گریہ ہزار اٹھتا ہے


کون ہے جس کو جاں عزیز نہیں؟
لے ترا جاں نثار اٹھتا ہے


صف بہ صف آ کھڑے ہوئے ہیں غزال
دشت سے خاکسار اٹھتا ہے


ہے یہ تیشہ کہ ایک شعلہ سا
بر سرِ کوہسار اٹھتا ہے


کربِ تنہائی ہے وہ شے کہ خدا
آدمی کو پکار اٹھتا ہے


تو نے پھر کَسبِ زَر کا ذکر کیا
کہیں ہم سے یہ بار اٹھتا ہے


لو وہ مجبورِ شہر صحرا سے
آج دیوانہ وار اٹھتا ہے


اپنے ہاں تو زمانے والوں کا
روز ہی اعتبار اٹھتا ہے


جون اٹھتا ہے، یوں کہو، یعنی
میر و غالب کا یار اٹھتا ہے​

 

[Just_Like_Roze]

میرا میری ذات میں سودا ہوا
اور میں پھر بھی نہ شرمندہ ہوا


کیا سناؤں سرگزشتِ زندگی
اک سرائے میں تھا میں ٹھیرا ہوا


پاس تھا رشتوں کا جس بستی میں عام
میں اس بستی میں بے رشتہ ہوا


اک گلی سے جب سے روٹھن ہے مری
میں ہوں سارے شہر سے روٹھا ہوا


پنج شنبہ اور دکانِ مے فروش
کیا بتاؤں کیسا ہنگامہ ہوا​

 

[Just_Like_Roze]

عجب تھا اس کی دلداری کا انداز
وہ برسوں بعد جب مجھ سے مِلا ہے
بَھلا میں پوچھتا اس سے تو کیسے
متاعِ جاں! تمہارا نام کیا ہے​

 

[Just_Like_Roze]

مجھ کو بیگانہ کر گئے مرے دن
مجھ سے ہو کر گزر گئے مرے دن


اب نہ کوئی دن مرے گھر جائے گا
جانئے کس کے گھر گئے مرے دن


اب نہیں ہیں مرے کوئی دن رات
کہ مجھ ہی کو بسر گئے مرے دن


ساری راتیں گئیں مری بے حال
مرے دن ! بے اثر گئے مرے دن


خوشا اب انتظار ہے نہ امید
یار یاراں ! سدھر گئے اب دن


اب میں بس رہ گیا ہوں راتوں میں
مر گئے جون ! مر گئے مرے دن​

 

[Just_Like_Roze]

جانے کب سے
مجھے یاد بھی تو نہیں جانے کب سے
ہم اک ساتھ گھر سے نکلتے ہیں
اور شام کو
ایک ہی ساتھ گھر لوٹتے ہیں
مگر ہم نے اک دوسرے سے
کبھی حال پرسی نہیں کی
نہ اک دوسرے کو
کبھی نام لے کر مخاطب کیا
جانے ہم کون ہیں؟​

 

[NXXXS]

 

[Just_Like_Roze]

میرا میری ذات میں سودا ہوا
اور میں پھر بھی نہ شرمندہ ہوا


کیا سناؤں سرگزشتِ زندگی
اک سرائے میں تھا میں ٹھیرا ہوا


پاس تھا رشتوں کا جس بستی میں عام
میں اس بستی میں بے رشتہ ہوا


اک گلی سے جب سے روٹھن ہے مری
میں ہوں سارے شہر سے روٹھا ہوا


پنج شنبہ اور دکانِ مے فروش
کیا بتاؤں کیسا ہنگامہ ہوا​

 

[Just_Like_Roze]

نہ پوچھ اس کی جو اپنے اندر چُھپا
غنیمت کہ میں اپنے باہر چُھپا


مجھے یاں کسی پہ بھروسہ نہیں
میں اپنی نگاہوں سے چھپ کر چُھپا


پہنچ مخبروں کی سخن تک کہاں
سو میں اپنے ہونٹوں میں اکثر چُھپا


مری سن! نہ رکھ اپنے پہلو میں دل
اسے تو کسی اور کے گھر چُھپا


یہاں تیرے اندر نہیں میری خیر
مری جاں مجھے میرے اندر چُھپا


خیالوں کی آمد میں یہ آرجار
ہے پیروں کی یلغار تو سر چُھپا​

 

[Just_Like_Roze]

چار سُو مہرباں ہے چوراہہ
اجنبی شہر ، اجنبی بازار
میری تحویل میں نہیں سمتیں
کوئی رستہ کہیں کو جاتا ہے
چار سُو مہرباں ہے چوراہہ​

 

[Just_Like_Roze]

ناروا ہے سخن شکایت کا
وہ نہیں تھا میری طبیعت کا


دشت میں شہر ہو گئے آباد
اب زمانہ نہیں ہے وحشت کا


وقت ہے اور کوئی کام نہیں
بس مزہ لے رہا ہوں فرصت کا


بس اگر تذکرہ کروں تو کروں
کس کی زلفوں کا کس کی قامت کا


مر گئے خواب سب کی آنکھوں کے
ہر طرف ہے گلہ حقیقت کا


اب مجھے دھیان ہی نہیں آتا
اپنے ہونے کا ، اپنی حالت کا


تجھ کو پا کر زیاں ہوا ہم کو
تو نہیں تھا ہماری قیمت کا


صبح سے شام تک میری دُنیا
ایک منظر ہے اس کی رخصت کا


کیا بتاؤں کہ زندگی کیا تھی
خواب تھا جاگنے کی حالت کا


کہتے ہیں انتہائے عشق جسے
اک فقط کھیل ہے مروت کا


آ گئی درمیان روح کی بات
ذکر تھا جسم کی ضرورت کا


زندگی کی غزل تمام ہوئی
قافیہ رہ گیا محبت کا​

 

[Just_Like_Roze]

دھُند چھائی ہوئی ہے جھیلوں پر
اُڑ رہے ہیں پرندے ٹیلوں پر
سب کا رُخ ہے نشیمنوں کی طرف
بستیوں کی طرف، بنوں کی طرف
اپنے گَلوں کو لے کے چرواہے
سرحدی بستیوں میں جا پہنچے
دلِ ناکام میں کہاں جاؤں
اجنبی شام، میں کہاں جاؤں​

 

[Just_Like_Roze]

لہو روتے نہ اگر ہم دمِ رخصت یاراں
کیا عجب تھا کہ کوئی اور تماشہ کرتے
چلو اچھا ہے کہ وہ بھی نہیں نزدیک اپنے
وہ جو ہوتا تو اُسے بھی نہ گوارا کرتے​

 

[Just_Like_Roze]

وقت درماں پذیر تھا ہی نہیں
دل لگایا تھا، دل لگا ہی نہیں


ترکِ الفت ہے کس قدر آسان
آج تو جیسے کچھ ہوا ہی نہیں


ہے کہاں موجۂ صبا و شمیم
جیسے تو موجۂ صبا ہی نہیں


جس سے کوئی خطا ہوئی ہو کبھی
ہم کو وہ آدمی ملا ہی نہیں


وہ بھی کتنا کٹھن رہا ہو گا
جو کہ اچھا نہ تھا ، برا بھی نہیں


کوئی دیکھے تو میرا حجرۂ ذات
یاں سبھی کچھ وہ تھا جو تھا ہی نہیں


ایک ہی اپنا ملنے والا تھا
ایسا بچھڑا کہ پھر ملا ہی نہیں​