Nazam Collection

[Wasif Safi]

tum ye kaise judaa ho gaye
har taraf har jagah ho gaye


apanaa cheharaa na badalaa gayaa
aa_iine se Khafaa ho gaye


jaane vaale gaye bhii kahaa.N
chaa.Nd suuraj ghaTaa ho gaye


bevafaa to na vo the na ham
yuu.N huaa bas judaa ho gaye


aadamii bananaa aasaa.N na thaa
sheKh jii ???? ho gaye

 

[Wasif Safi]

teraa hijr meraa nasiib hai teraa Gam hii merii hayaat hai
mujhe terii duurii kaa Gam ho kyo.n tuu kahii.n bhii ho mere saath hai
mere vaaste tere naam par koii harf aaye nahii.n nahii.n
mujhe Khauf-e-duniyaa nahii.n magar mere ruu-ba-ruu terii zaat hai
teraa vasl ai merii dilarubaa nahii.n merii kismat to kyaa huaa
merii mahajabii.n yahii kam hai kyaa terii hasarato.n kaa to saath hai
teraa ishq mujh pe hai maharabaa.N mere dil ko haasil hai do jahaa.N
merii jaan-e-jaa.N isii baat par merii jaan jaaye to baat hai

 

[Wasif Safi]

tanhaa tanhaa ham ro le.nge mahafil mahafil gaaye.nge
jab tak aa.Nsuu paas rahe.nge tab tak giit sunaaye.nge


tum jo socho vo tum jaano ham to apanii kahate hai.n
der na karanaa ghar jaane me.n varanaa ghar kho jaaye.nge


bachcho.n ke chhoTe haatho.n ko chaa.Nd sitaare chhuune do
chaar kitaabe.n pa.Dh kar vo bhii ham jaise ho jaaye.nge


kin raaho.n se duur hai ma.nzil kaun saa rastaa aasaa.N hai
ham jab thak kar ruk jaaye.nge auro.n ko samajhaaye.nge


achchhii suurat vaale saare patthar-dil ho mumkin hai
ham to us din raa_e de.nge jis din dhokaa khaaye.nge

 

[Wasif Safi]

safar me.n dhuup to hogii jo chal sako to chalo
sabhii hai.n bhii.D me.n tum bhii nikal sako to chalo


idhar udhar ka_ii ma.nzil hai.n chal sako to chalo
bane banaaye hai.n saa.Nche jo Dhal sako to chalo


kisii ke vaasate raahe.n kahaa.N badalatii hai.n
tum apane aap ko Khud hii badal sako to chalo


yahaa.N kisii ko koii raastaa nahii.n detaa
mujhe giraake agar tum sambhal sako to chalo


yahii hai zindagii kuchh Khvaab chand ummiide.n
inhii.n khilauno.n se tum bhii bahal sako to chalo


har ik safar ko hai mahafuus raasto.n kii talaash
hifaazato.n kii rivaayat badal sako to chalo


kahii.n nahii.n ko_ii suuraj, dhuaa.N dhuaa.N hai fizaa
Khud apane aap se baahar nikal sako to chalo

 

[Wasif Safi]

sab kii puujaa ek sii, alag alag har riit
masjid jaaye maulavii, koyal gaaye giit


puujaa ghar me.n muurtii, miiraa ke sang shyaam
jitanii jisakii chaakarii, utane usake daam


siitaa-raava.Nn, raam kaa, kare.n vibhaajan log
ek hii tan me.n dekhiye, tiino.n kaa sa.njog


miTTii se maaTii mile, kho ke sabhii nishaa.N
kis me.n kitanaa kaun hai, kaise ho pahachaan

 

[Wasif Safi]

muu.Nh kii baate.n sune har ko_ii, dil kaa dard na jaane kaun
aavaazo.n ke baazaaro.n me.n Khaamoshii pahachaane kaun
sadiyo.n sadiyo.n vahii tamaashaa rastaa rastaa lambii khoy
lekin jab ham mil jaate hai.n, kho jaataa hai jaane kaun
vo meraa aa_iinaa hai mai.n us kii parachhaa_ii huu.N
mere hii ghar me.n rahataa hai, mujh jaisaa hii jaane kaun
kirat kirat halkaa saa suuraj, palal palak khulatii nii.nde.n
yuu.N hii dilpighal rahaa hai, zarraa-zarraa jaane kaun

 

[Wasif Safi]

muhabbat me.n vafaadaarii se bachiye
jahaa.N tak ho adaakaarii se bachiye


har ek suurat bhalii lagatii hai kuchh din
lahuu ke shobadaakaarii se bachiye


sharaafat aadamiyat dard-mandii
ba.De shahro.n me.n biimaarii se bachiye


zaruurii kyaa har ek mahafil me.n aanaa
taqalluf kii ravaadaarii se bachiye


binaa pairo.n ke sar chalate nahii.n hai.n
buzurgo.n kii samajhadaarii se bachiye

 

[Wasif Safi]

masjido.n-mandiro.n kii duniyaa me.n
mujhako pahachaanate kahaa.N hai.n log


roz mai.n chaa.Nd ban ke aataa huu.N
din me.n suuraj saa jagamagaataa huu.N


khan-khanaataa huu.N maa.N ke gahano.n me.n
ha.Nsataa rahataa huu.N chhup ke bahano.n me.n


[maa.N=mother; gahanaa=jewellery]


mai.n hii mazaduur ke pasiine me.n
mai.n hii barasaat ke mahiine me.n


[mazaduur=labourer; pasiinaa=sweat; mahiinaa=month]


merii tasviir aa.Nkh kaa aa.Nsuu
merii tahariir jism kaa jaduu


[tahariir=handwriting]


masjido.n-mandiro.n kii duniyaa me.n
mujhako pahachaanate nahii.n jab log


mai.n zamiino.n ko be-ziyaa karake
aasamaano.n me.n lauT jaataa huu.N


[be-ziyaa=without light]


mai.n Khudaa ban ke qahar Dhaataa huu.N


[qahar=rage/anger; qahar Dhaanaa=wreak havoc/destroy]

 

[Wasif Safi]

mai.n royaa parades me.n bhiigaa maa.N kaa pyaar
dukh ne dukh se baat kii bin chiThThii bin taar
chhoTaa karake dekhiye jiivan kaa vistaar
aa.Nkho.n bhar aakaash hai baaho.n bhar sa.nsaar


leke tan ke naap ko ghuume bastii gaa.Nv
har chaadar ke gher se baahar nikale paa.Nv
sabakii puujaa ek sii alag-alag har riit
masjid jaaye maulvii koyal gaaye giit
puujaa ghar me.n muurtii miira ke sang shyaam
jisakii jitanii chaakarii utane usake daam


saato.n din bhagavaan ke kyaa ma.ngal kyaa piir
jis din soe der tak bhuukaa rahe fakiir
achchhii sangat baiThakar sangii badale ruup
jaise milakar aam se miiThii ho ga_ii dhuup


sapanaa jharnaa nii.nd kaa jaagii aa.Nkhe.n pyaas
paanaa khonaa khojanaa saa.Nso.n kaa itihaas
chaahe giitaa vaachiye yaa pa.Dhiye quraan
meraa teraa pyaar hii har pustak kaa Gyaan

 

[Wasif Safi]

besan kii so.ndhii roTii par
khaTTii chaTanii jaisii maa.N
yaad aatii hai chaukaa-baasan
chimaTaa phukanii jaisii maa.N


baa.Ns kii khurrii khaaT ke uupar
har aahaT par kaan dhare
aadhii so_ii aadhii jaagii
thakii dopaharii jaisii maa.N


chi.Diyo.n ke chahakaar me.n gu.Nje
raadhaa-mohan alii-alii
murGe kii aavaaz se khulatii
ghar kii ku.nDii jaisii maa.N


bivii, beTii, bahan, pa.Dosan
tho.Dii tho.Dii sii sab me.n
din bhar ik rassii ke uupar
chalatii naTanii jaisii maa.N


baa.NT ke apanaa cheharaa, maathaa,
aa.Nkhe.n jaane kahaa.N ga_ii
phaTe puuraane ik alabam me.n
cha.nchal la.Dakii jaisii maa.N

 

[Wasif Safi]

soz-e-dil bhii nahii.n sukuu.N bhii nahii.n
zindagaanii vabaal yuu.N bhii hai


terii Khvaahish aur is qadar Khvaahish
vajah-e-haasil sahii junuu.N bhii hai


Khush bhii hai iltafaat-e-dost se dil
Gairat-e-ishq sar niguu.N bhii hai


jal ke bujh bhii ga_ii ’Zia’ aksar
aag siine me.n jyo.n kii tyo.n bhii hai

 

[Wasif Safi]

kyaa sarokaar ab kisii se mujhe
vastaa thaa to thaa tujhii se mujhe


behisii kaa bhii ab nahii.n ehasaas
kyaa huaa terii beruKhii se mujhe


maut kii aarazuu bhii kar dekhuu.N
kyaa ummiide.n thii zindagii se mujhe


phir kisii par na aitabaar aaye
yuu.N utaaro na apane jii se mujhe


tera Gam bhii na ho to kyaa jiinaa
kuchh tasallii hai dard hii se mujhe


kar gaye kis qadar tabaah ’Zia’
dushman, andaaz-e-dostii se mujhe

 

[Wasif Safi]

har tarannum me.n milii hai terii aavaaz mujhe
ek hii naGmaa sunaataa hai har ek saaz mujhe


ishq kaa bhii ko_ii anjaam huaa karataa hai
ishq me.n yaad hai aaGaaz hii aaGaaz mujhe


jaise viiraane se Takaraa ke palaTatii hai sadaa
dil ke har goshe se aa_ii terii aavaaz mujhe


jo kisii ko bhii na chaahe use chaahanaa
umr bhar apanii muhabbat par rahaa naaz mujhe

 

[Wasif Safi]

dil me.n jo kuchh hai abhii us kii paziiraa_ii nahii.n
hamaa Khushbuu huu.N par khilane kii gha.Dii aa_ii nahii.n


[paziiraa_ii = acceptance]


ankahii baat ke sau ruup kahii baat kaa ek
kabhii sun vo bhii jo minnat-e-kash-e-goyaa_ii nahii.n


[goyaa_ii = power of speech]


merii nazaro.n me.n hai khilate hue phuulo.n kii tarah
vo namii jo abhii shaaKho.n me.n bhii laharaa_ii nahii.n


kyaa manaazir the ki jo dekhatii aa.Nkho.n ko dekhe
Khvaab bunataa huu.N ki aasuudaa-e-biinaa_ii nahii.n


[manaazir = scenes/views; aasuudaa-e-binaa_ii = satisfaction of sight/vision]


sabhii daanaa sabhii sar Daal ke chup baiThe rahe
ki yahaa.N ko_ii bhii shaa_istaa-e-rusvaa_ii nahii.n


[daanaa = wise]


dil bujhaa ho to gul-e-naGmaa bhii nashtar hai ’Zia’
shiddat-e-Gam kaa ilaaj anjuman-e-aaraa_ii nahii.n

 

[Wasif Safi]

ab ye aa.Nkhe.n kisii taskiin se taabindaa nahii.n
mai.n ne raftaa se ye jaanaa hai ke aa_indaa nahii.n


dil ye viraa.N dam-e-iisaa hai gaye vaqt kii yaad
kaun saa aalam kaa ye raftaa hai ke zindaa nahii.n


tuu bhii chaahe to na aayegii vo biitii hu_ii raat
hai vahii chaa.Nd magar vaisaa daraKhshandaa nahii.n


kabhii Gunche ko mahakane se ko_ii rok sakaa
shauq agar hai to izaaKhaar se sharmindaa nahii.n

 

[Wasif Safi]

Guruub-e-shaam hii se Khud ko yuu.N mahasuus karataa huu.N
ki jaise ik diyaa huu.N aur havaa kii zad pe rakhaa huu.N


chamakatii dhuup tum apane hii daaman me.n na bhar lenaa
mai.n saarii raat pe.Do.n kii tarah baarish me.n bhiigaa huu.N


ko_ii TuuTaa huaa rishtaa na daaman se ulajh jaaye
tumhaare saath pahalii baar baazaaro.n me.n nikalaa huu.N


ye kis aavaaz kaa bosaa mere ho.nTho.n pe kaa.Npaa hai
mai.n pichhalii shab sadaao.n kii halaavat bhuul baiThaa huu.N


bichha.D ke tum se mai.n ne bhii ko_ii saathii nahii.n Dhuu.NDhaa
hujuum-e-rah_guzar me.n duur tak dekho akelaa huu.N

 

[Wasif Safi]

zindagii tujh se mil kar zamaanaa huaa
aa tujhe aaj ham maikade le chale.n
raat ke naam ho.NTho.n ke saaGar likhe.n
apanii aa.Nkho.n me.n kuchh rat-jage le chale.n
kyaa hassi.n log hai.n
aa.Nkh aaho.n kii hai.n aur lab pankha.Dii
in kii aaraa_ish-e-Khal-o-Khat ke liye
apanii aa.Nkho.n ke ham aa_iine le chale.n
ajanabii chehare me.n dost banate nahii.n
rishte-naato.n kii chaa.Ndii barastii nahii.n
qurbate.n sohabate.n jin kii yaad aayengii
aise kuchh dosto.n ke pate le chale.n
un kii aa.Nkho.n ne jalate sulagate hue
manzaro.n ke sivaa kuchh bhii dekhaa nahii.n
chehara-e-afsos ke sakino.n ke liye
phuul-o-Khushbuu sabaa zam-zame.n le chale.n
zindagii tujh se mil kar zamaanaa huaa

 

[Wasif Safi]

rah-e-aashiqii ke maare rah-e-aam tak na pahu.Nche
kabhii subah tak na pahu.Nche kabhii shaam tak na pahu.Nche


mujhe mast agar banaa de ye nigaah-e-mast terii
mera haath kyaa nazar bhii kabhii jaam tak na pahu.Nche


mujhe apanii bekasii kaa nahii.n Gam Khayaal ye hai
kahii.n baat ba.Dhate ba.Dhate tere naam tak na pahu.Nche


jo ye daur bevafaa hai tera Gam to mustaqil ho
vo hayaat-e-aashiqii kyaa jo davaam tak na pahu.Nche


[mustaqil=permanent; dawaam=infinity]


ye anokhii bar_hamii hai ke na bhuule se labo.n par
basabiil-e-tazaqiraa bhii mere naam tak na pahu.Nche


[barahamii=injustice; basabiil-e-tazaqiraa=in the course of discussion]


kahii.n is tarah bhii ruuThe na kisii se ko_ii ’Yahya’
ke payaam tak na aaye ke salaam tak na pahu.Nche

 

[Wasif Safi]

josh par phir hai tabiyat tere diivaano.n kii
phir chamakane ko hai taqdiir biyaabaano.n kii


TuuTaa TuuTaa saa hai har ek sahaaraa dil kaa
suunii suunii hai duniyaa mere armaano.n kii


saarii duniyaa to chhuuTii tum ne bhii muu.Nh mo.D liyaa
qaabil-e-raham hai haalat mere armaano.n kii


aur hii ruKh hai havaa-e-Gam-e-dil kaa "Yahya"
bahakii bahakii sii hai baate.n tere diivaano.n kii

 

[Wasif Safi]

jahaa.N ban ban ke aas dil kii TuuTii jaatii hai
vahii.n qismat kha.Dii bechaaragii pe muskuraatii hai


Gam-e-ulfat ke haatho.n jo miTaa be-aasaraa ho kar
usii paamaal-e-Gam ko haaye ab duniyaa sataatii hai


kahaa.N rahataa hai qaabuu phir dil-e-naakaam par mujh ko
ke jab rah rah ke tanahaa_ii me.n terii yaad aatii hai


havaa-e-Gam kaa muntazar huu.N vafuur-e-shauq me.n ’Yahya’
magar ab dekhiye un kii tajallii kyaa dikhaatii hai