khudaya ay mere piyare khudaya
illah al alimeen rubb ul braya
maleek o malik o khallaaq e alam
raheem o rahim o bahr ul ataya
tere dargeh main ik ummed le kr
tera ik banda e aasi hai aya
wo khali hath hai har paishkash se
nahin laya wo sath apne hidaya
jo tu ne di is ko taqat e kher
wo kr betha hai is ka bhi safaya
wo hewano se badter ho raha hai
nahin taqwa main hasil koi paya
simat kr bun gai neki saweda
ufaq pe chha gain is ki khataya
bataon kia k shetan ne kahan se
kahan leja k hai is ko giraya
nahin araam pal bhar bhi muyasar
hai is zalim ne kuchh aesa sataya
jahan ka chapa chapa dekh dala
magar koi thikana bhi na paya
huwa mayus jab charon taraf se
na jab koshish ne is ka kuchh banaya
to hir phir kr yehi tadbeer sujhi
teri taqdeer ka dar khatkhataya
yehe hai aarzu is ki ilahe
yehe hai iltaja is ki khudaya
keh mashriq aur maghrib dekh daly
sakun lekin kahin is ne na paya
teri dargah main aakhir ul amar
tamana dil main lekr hai ye aya
teri rehmat ki diwaron k ander
kalam ALLAH ka miljay saya
to wo dhooni mohabat ki rama kr
jalay sab jahalat aur maya
