Assalamualaikum wrwb doston
ALLAH RABBUL IZZAT ka behisaab shukr o ehsaan hai ke isne hame na sirf apna banda banaya balke huzoor alaihusalaam ki ummat me rehkar behtar tareeqe se zindagi guzaarne ka mauqa inaayat farmaaya hai. sabse pehle hum apni qulqat per ghaur o fikr karen ke hum pehle kuch na the lekin isne hame wajood ataa farmaaya, wilaadat ke baad hum apni taraf se harkat karne ke bhi qaabil na the to apne waaldein ne hame is qaabil banaaya aur hum apni zindagi ke marhale taye karne lage yaha tak ke hum jawaan hogae.
ab hame ye dekhna hai ke hamari ye jawani kya ALLAH aur Rasool allah salal laahu alaihuasalam ke tareeqe ke mutabiq aage barh rahi hai ya nahi. ya phir hum apni jawani ka ghalat istemal karte hue dunya ko haasil karna chahte hai. Agar yahi mansha hamara hai to ye jawani hamare liye dunya aur aaqirat me koi kaam nahi aayegi.
ALLAH RABBUL IZZAT ka irshaad-e-paak hai ke (Aye habeeb-e-pak aap farmaadijiye dunya ka saaz o saman thora hai) ab is aayat me hame ghaur karna hai ke ALLAH RABUL IZZAt hamse is dunya ke baare me kya kehna chahta hai, yahi ke ye dunya aur usme jo kuch hai sab ka sab thora hai aur wo bhi khatam hone wala hai koi cheez baaki rehne wali nahi siwae Amal-e-saaleh ke jawani hame isliye di gai hai ke ham is umar me taaqat ka sahi istemaal karen gaali galoj, fahash guftagu, hasi mazaak, dusron ka nuqsan karna walidain ghar aur baaher ke afraad ke saath nazeba alfaaz ka istemal tamaam baron aur choton ka adab wo ehteraam asaateza ka ehteram, buzrugaanedeen ki taazim aur khaas taur per ALLAH ka khauf aur Rasool -e-pak Sallal laahu Alaihuasallam ki tazeem o takreem baja laana behad zaruri hai
Chunache Hazrat Imam e Ghazali rehmathullah alai apni kitaab Makaashiftal khuloob me tehreer farmaate hai ke ek buzurg hazrat Mutraf bin Abdullah rehmatullah alae ne ek shaqs ko reshmi jhubba pehne bare faqr o naaz se chalte hue dekh kar kaha ki Aye Bandae Khuda ye chaal unlogon ki hai jinhe ALLAH TAALA napasand karta hai aur jo Rasool-e-Khuda Sallal laahu Alaihuasalam ke dushman hai. to is shaqs ne kaha ke pehchaante hue ke mai kaun hun uske jawab me Hazrat Mutraf rehmatullah alai farmaane lage ke mai achi tarah jaanta aur pehchaanta hun teri ibteda napaak nutfe se, teri inteha gande murdaar ke taur per hai aur darmiyaani muddat me tu gandagi uthae phirta hai. to wo shaqs buzurg se ye saari baaten sun kar apni takabburaana aur magroorana chaal chor diya isse pata chalta hai ke hame apni jawani me takkabbur ko hargiz ikhtiyar nahi karna chahiye aye Naujawaan aane wali tehreer ko baghaur parhlijiye.
Aye naujawan yaad rakh!
Agar ALLAH TAALA ne tujhe khoobsurat banaya hai to usper tu math akarh balke RABBE TABAArakutaala ka shukar adaa kar.
Aye naujawan yaad rakh !
Agar tu khubsurti per faqr karega to yahi khubsurti tujhe qabr me badbudaar murdaar bana degi.
Aye Naujawwan yaad rakh !
Is dunya se tu koch karne wala hai tawaze aur inkesaari ko ikhtiyaar kar..
Aye naujawan yaad rakh !
Maut ka inkaar tu kabhi math kar takabbur ko chor aur salaamti per khaayam reh..
Aye naujawaan yaad rakh !
ye dunya ki zindagi chand roza hai, maut ko har roz yaad kar.
Ye tehreer ki chand baaten hum naujawaanon ke liye bohot hi zaruri hai ke wo isko parh kar apni zindagi me inqilaab laane ki koshish karen aur ye irada bhi karlen hum aayinda kabhi aisa koi kaam ghalat nahi karenge ke jisse hamare muashre ki badnaami hojae, balke hum ye koshish karenge ke hum bhi nek banen aur hamare saath rehne wale bhi nek bane
Hum tamaam ye ehed karen ke hamesha ALLAH TAALA aur Rasool ALlah sallla laahu alahiuasallam ki itaa'at zarur karenge
Kabhi bhi shaan-e-risaalat me beadbi aur gustaakhi nahi karenge balke eshaat-e-deen aur sunnat-e-mustafa Sallal laahu alaihuasalam ko ujaagar karne ke liye hum tamaam naujawan apni taakhat ka har waqt sahi istemaal karenge ALLAH RAABUL IZZAT hum tamaam naujawano ko nek taufeeq ataa farmae Ameen