ہے مرا مشن تری جستجو تری شان جلّ جلالہ

[imranlibra1398]

ہے مرا مشن تری جستجو تری شان جلّ جلالہ
تجھے ڈھونڈتا ہوں میں کو بہ کو تری شان جلّ جلالہ​

تُو شکور ہے تُو غفور ہے سو یہ عرض تیرے حضور ہے
میں گناہ گار ہوں بخش تُو تری شان جلّ جلالہ​

تُو کریم ہے تُو رحیم ہے تُو حلیم ہے تُو عظیم ہے
تُو علیم ہے، ہے خبیر تُو تری شان جلّ جلالہ​

تجھے دیکھے بن میں فدا ہوا کہ ترے ہی درکا گدا ہوا
ہے ترے فراق میں ہاؤ ہُو تری شان جلّ جلالہ​

تری ذات حاصلِ کائنات ترا ذکر ہی ہے مری حیات
ترا عشق ہے مری آرزو تری شان جلّ جلالہ​

نہیں فکر کی کوئی بات ہے تری ذات گر مرے ساتھ ہے
بھلا کیا کرے گا مرا عدو تری شان جلّ جلالہ​

ترا پیار روح کا تزکیہ ترا وصل غیر سے تخلیہ
ترا عشق قلب کا ہے وضو تری شان جلّ جلالہ​

ہے تمنا عشق کے باب میں سرِ حشر تیری جناب میں
یہ کہے اثرؔ ترے روبرو تری شان جلّ جلالہ

​

www bazm org حضرت شاہین اقبال اثرؔصاحب دامت برکاتہم