Kabhi jo cheR gayee yaad-E-raftagaaN Mohsin
Bikhar gayee haiN nigaaheN kahaaN kahaaN Mohsin
Bikhar gayee haiN nigaaheN kahaaN kahaaN Mohsin
Hawa ne raakh urraaii to dil ko yaad aayaa
K jal bujheeN mere khaabon ki bastiyaaN Mohsin
K jal bujheeN mere khaabon ki bastiyaaN Mohsin
Kuch aaise ghar bhi miley jin meN ghooNgatoN k iwaz
Hui haiN dafn dopattoN meN larrkiyaaN Mohsin
Hui haiN dafn dopattoN meN larrkiyaaN Mohsin
KhaNdar hai ahd-E-guzishta na chhu na chheR isay
KhuleN to band na hoN is ki khirrkiyaaN Mohsin
KhuleN to band na hoN is ki khirrkiyaaN Mohsin
Bujha hai kaun sitaaraa k apni aankh k saath
Huey haiN saare manaazir dhuaaN dhuaaN Mohsin
Huey haiN saare manaazir dhuaaN dhuaaN Mohsin
Nahi k us ne ganwaaye haiN maah O saal apne
Tamaam umr kaTi yuun bhi raaegaaN Mohsin
Tamaam umr kaTi yuun bhi raaegaaN Mohsin
Mila to aur bhi taqseem kar gaya mujh ko
SameiTna theeN jisay meri kirchiyaaN Mohsin
SameiTna theeN jisay meri kirchiyaaN Mohsin
KahiN se us ne bhi toRa hai khud se rabt-E-wafa
Kahin se bhool gaya maiN bhi daastaaN Mohsin
Kahin se bhool gaya maiN bhi daastaaN Mohsin