Saiyyan zaat adhoori hai

[Qawareer]

Saiyyan zaat adhoori hai
Saiyyan baat adhoori hai
Saiyyan raat adhoori hai
Saiyyan maat adhoori hai
Dushman chaukanna hai lekin
Saiyyan ghaat adhori hai

Saiyyan ranj malaal bohat
Deewane be-haal bohat
Qadam qadam par jaal bohat
Pyar mohabbat kaal bohat
Or isi aalam main saiyyan
Guzar gaye hain saal bohat

Saiyyan har soo dard bohat
Mosam mosam sard bohat
Rasta rasta gard bohat
Chehra chehra zard bohat
Or sitam dhaane ki khatar
Tera ik ik fard bohat

Saiyyan tere sheher bohat
Gali gali main zehar bohat
Khof zada hai dehar bohat
Us pe tera qeher bohat
Kaali raaten itni kyun
Hum ko ik hi peher bohat

Saiyyan dil majboor bohat
Rooh bhi choor-o-choor bohat
Peshaani be-noor bohat
Or lamhay maghroor bohat
Aise mushkil aalam main
Tu bhi hum se door bohat

Saiyyan mere taaray gum
Raat ke chund sahare gum
Saiyyan rishte toot gaye
Saiyyan apne chhoot gaye
Apni zaat na zaaton main
Apna naam na naamon main​