Naazayz

[vamp545]

Us subah jab Neeraj ne aankhen kholi toh sabse pehli cheez jo uske haath mein aayi vo uska mobile phone tha. Usne ek nazar apni side mein so rahi apni biwi par daali aur bed se uthkar khidki par khada ho gaya.

"Well?" Usne cell mein ek message type kiya aur Ishita ko bhej diya

1 minute baad hi Ishsita ka jawab aa gaya.

"The pills didnt work. I am still pregnant"

Neeraj ka dil beth gaya.

"Are you sure?" Usne phir message bheja

"Of course i am sure" Inshita ka jawab aaya "I am still pregnant"

Neeraj ko jaise khade khade chakkar aane lage. Vo vahin side mein rakhi kursi par sahara lekar beth gaya. Uski saari duniya jaisi is baat par tiki hui thi ke vo goliyaan kaam kar jaayengi par aisa hua nahi tha aur ab usko samajh nahi aa raha tha ke kya kare.

Neeraj shehar ke sabse bade college mein lecturer tha. Umar 40 saal, kad 6 foot, rang gora, built athletic. Uske paas vo sab kuchh tha jo ek insaan ko apni zindagi mein chahiye ho sakta tha. Ek achhi naukri, ek sundar biwi, ek 5 saal ki beti, ghar, gaadi, paisa sab kuchh. Vo apni biwi se bahut pyaar karta tha jisse ki usne 10 saal ke affair ke baad love marriage ki thi. Vo aur uski biwi Neha ek hi school mein padhte the aur saath saath aate jaate the. Vahin dono ki bachpan ki dosti pyaar mein badli, pyaar 10 saal tak parwan chadha aur phir dono ne shaadi kar li.

Neeraj ki poori zindagi mein Neha ki siwa aur koi doosri ladki nahi aayi thi aur na hi Neeraj ko kisi aur ladki ki zaroorat padi. Neha ek bahut khoobsurat aurat thi. Vo sab kuchh thi jo ek mard ko apni biwi mein chahiye ho sakta hai. Din mein ghar mein ek khyaal rakhne wali maan, baat karne liye ek bahut achhi dost aur raat ko bistar par ek aurat. Yahi toh chahta hai har mard ke aurat se aur ye sab kuchh Neeraj ko Neha se haasil ho raha tha. Vo uski life mein pehli ladki thi aur aakhri bhi, aisa Neeraj ne maan liya tha.

Aur phir uski poori life ko uthpal puthal karne ke liye aayi Ishita. Vo 1st year ki student thi aur college ka shayad hi koi ladka hoga jo uske pichhe nahi tha. Par vo aakar giri Neeraj ki jholi mein, kaise ye use khud ko kabhi samajh nahi aaya.

Aisa nahi tha ke vo is laayak nahi tha, par vo khud kaise Ishita ke chakkar mein pad gaya, vo khud bhi nahi janta tha.

Jab Ishita ne uski taraf apna interest dikhaya toh ye Neeraj ke liye koi nayi baat nahi tha. Vo shakal soorat se ek bahut handsome aadmi tha aur aksar uski kayi students usko pasand karti thi. Kuchh uske pyaar mein pad jaati thi, kuchh bas uske saath ghoomna chahti thi kyunki vo bahut handsome aadmi tha aur kuchh uske saath sirf exam mein achhe numbers haasil karne ke liye sona chahti thi. Par in sabko Neeraj ne kabhi koi lift nahi di.

Aur Ishita ke aane ke baad sab badal gaya. Vo shehar ke ek bahut bade ameer baap ki aulad thi par uske haav bhaav se aisa bilkul nahi lagta tha. Vo ek sidhi saadi si, khamosh si rehne wali ladki thi. Na zyada kisi se baat karti thi, na zyada kisi ke munh lagti thi.

Vo din Neeraj ko aaj bhi achhi tarah se yaad tha jab uske aur Ishita ke rishte ki shurat hui thi. College khatam ho chuka tha aur sirf kuchh professors hi apne offices mein bach gaye the. Neeraj bhi apne office mein betha kaam nipta raha tha ke darwaza khula aur Ishita andar aa gayi. Uske haathon mein ek gulaab ka phool tha jo vo apne pyaar ka izhaar karte hue Neeraj ko dena chahti thi.

Aur uske baad agle 2 ghante tak Neeraj usko yahi samjhata raha ke aisa nahi ho sakta aur ke vo shaadi shuda hai. Us waqt toh Ishita samjh kar vahan se chali gayi par us incodent ne jaane aisa kya kiya ke phir Neeraj khud uski taraf jhukta chala gaya. Vo khud Ishita ko apna interest dikhane laga, khud dheere dheere uske kareeb aaya aur ek din ek nazuk lamhe mein usne use poori tarah haasil kar liya.

 

[vamp545]

Ishita ko bistar tak laane mein Neeraj ko khaasi mehnat bhi karni padi thi. Aur shayad yahi vajah thi ke vo aur uski taraf khincha chala gaya. Neha, uski biwi, bed par ek aisi aurat thi jo khud pehal karne mein sharmati nahi par Ishita kaafi submissive type thi. Vo unmein se thi jo bistar par sharmati hain, mard ke pehel karne ka intezaar karti hain. Behla phusla kar ek ladki ko bistar tak laane ka khel uske liye naya tha aur Ishita ke saath ye khel khelte hue usko bahut maza aaya tha.

AUr yahi vo lamha tha jab ke usne vo bhaari bhool kar di thi. Ishita ke saath shaadi ka wada jo usne sirf isliye kiya tha ke vo aasani se saath sone ke liye maan jaaye.

Apne se aadhi umar ki us bachchi ke saath usne ek saal tak band kamro mein vaasna ka har vo khela jo vo khelna chahta tha. Jab bhi na nukur karti, use shaadi ki patti padha deta aur uske pyaar mein vo usko mana bhi nahi karti thi. Neeraj ko laga tha ke sab aise hi chalta rahega aur ek din Ishita college pass our karke chali jaayegi aur ye sab ek bhula kissa ho jaayega. Par jab ek din Ishita ne usko aakar bataya ke vo pregnant hai toh Neeraj ke pairon ke neeche se jaise zameen khisak gayi.

Pregnancy koi bahut badi baat nahi thi. Neeraj ye baat sambhal sakta tha par museebat ban gayi Ishita ki bachcha na girane ki zid. Vo chahti thi ke Neeraj apni biwi ko divorce de jo ki vo ek saal se keh raha tha aur Ishita se shaadi kare. Vo chahti thi ke vo Ishita ke ghar aaye, uske pita se mile, vo dono phere len aur apna pehla bachcha is duniya mein laayen.

Neeraj janta tha ke agar usne pregnancy wali baat kisi ko keh di toh vo khatam ho jaayega. Uski biwi use chhod degi, naukri jaayegi aur sabse badi baat, Ishita ka ameer baap usko zinda nahi rehne dega. Vo shehar ki ek jaani maani hasti tha.

Aur phir vo Ishita ko is baat ke liye manata raha ke abortion ho jaaye. Jab usne ye kaha ke pregnancy wali baat sunkar shayad Ishita ke pita shaadi na karne den toh vo maan gayi. Usne Neeraj ki is baat par yakeen kar liya ke kaun baap apni beti ha haath aise aadmi ke haath mein dega jo shaadi shuda hote hue bhi doosri ladki ke saath so raha tha.


Neeraj ne ek jhutha plan bataya ke pehle vo apni biwi ko divorce dega phir Ishita ke pita se milega taaki unki shaadi mein koi rukawat na aaye. Vo bechari bholi ladki uski baat mankar abortion ke liye razi ho gayi par tab tak der ho chuki thi.


Doctor ne abortion ke liye mana kar diya. Ishita ko manane mein bahut waqt nikal gaya tha. Vo abortion ki stage se aage nikal chuki thi.


Ek aakhri rasta vo goliyan thi jo Neeraj ne kal raat usko di thi par ab jabki vo goliyaan bhi fail ho gayi toh usko apni poori zindagi bikharti hui nazar aa rahi thi.


"Oh god" Usne apna sar pakadte hue socha "Kaash vo goliyan zehar ki hoti toh manhoos saali mar hi jaati"


Aur achanak uske dil mein ek khyaal aaya.


"Nahi nahi" Neeraj ne socha "Ye galat hai. Aisa nahi kar sakta main"


Us din vo taiyyar hokar college chala toh gaya par dimag mein darr ke siwa kuchh nahi tha. Siway iske ke Ishita bachche ko paida kare, unke paas koi chara nahi tha
Vo college ke ek corridor mein Ishita se mila. Unhone aise dikhaya ke ek student apne professor se studies discuss kar rahi hai par asal mein vahan khade vo dheere dheere kuchh aur hi baat kar rahe the.


Ishita ke pet par ab halka halka uthaan aana shuru ho gaya tha. Kisi anjaan ko abhi bhi ye pata nahi lag sakta tha ke vo pregnant hai par Neeraj ye baat janta tha.

Kuchh hafte aur phir poori duniya ko dikhai dega ke ye pregnant hai, Neeraj ne socha.

 

[vamp545]

"Ab hamare paas koi chara nahi hai. Apni wife ko divorce do jaldi please. Ab ham ye baat zyada nahi chhupa sakte," Ishita keh rahi thi thi.


"Tune 2 mahine pehle meri baat maan li hoti toh aisa hua hi na hota" Neeraj soch raha tha. Usko bahut gussa aa raha tha.


"Dekho ya toh tum kuchh karo nahi toh mujhe kuchh karna padega. Bhagwan ki kasam kuchh kar bethungi main" Ishita ne roti hui si aawaz mein kaha aur vahan se chali gayi.


Thodi der baad apne office mein bethe hue Neeraj ko aur koi rasta nahi soojh raha tha.


"Ismein meri koi galti nahi hai" Vo apne aap se keh raha tha "Vo khud mere paas aayi thi, khud hi mere gale padi aur khud hi abortion na karane ki zid. Saari galti uski hai aur uski galti ki keemat main aur mera pariwar nahi bharega. Galti ki hai toh bhugte, mare"


Jab Neeraj ne apna chehra aaine mein dekha toh khud ko hi pehchan nahi paya. Kuchh waqt pehle vo ek college ka ek shariff professor tha par ek saal mein kitna badal gaya tha. Apni biwi ko dhokha, apne profession ko dokha, apni ek student ko dhokha aur ab murder ka plan. Kitna badal gaya tha vo.


Plan usne saaf saaf bana liya tha aur plan ka hint bhi Ishita usko khud de gayi thi. Agar uska murder kiya jaaye toh bekar investigation ho jayegi. Sabko pata chal jaayega ki vo pregnant thi aur phir uske khud ke pakde jaane ke chances bhi the.

Par agar Ishita suicide kar le to? Usne khud hi kaha tha ke vo kuchh kar bethegi. Neeraj ko sirf itna karna tha ke us bevakoof ladki ko is hadh tak uksa dena tha ke vo sach mein kuchh kar bethe. Neeraj ko sirf use suicide karne ka rasta dikhana tha. Is andaaz mein ke Ishita ke yahi lage ke un dono ke aas ab koi chara nahi hai. Jaisa ki hindi movies mein hota hai.

Ham jeekar nahi mil sakta, apne pyaar ko paane ke liye hamen marna padega.

Jeekar ham mil nahi paaye toh kya, markar ek doosre ke ho jaayenge.

Sirf us bevakoof ko is baat par raazi kar lena hair aur suicide ka saaman use de dena hai, Neeraj ne socha.


Neeraj ko ab 2 kaam karne the aur dono hi usko bahut aasan lag rahe the.

Pehla tha Ishita ko suicide ke liye uksana. Is baat par raazi karna ke vo dono ek saath suide kar len, yahi aakhri rasta unke paas bacha tha.

Doosra, usko zehar lakar dena. Bahut aasan kaam tha. Vo ek chemistry professor tha aur aise chemicals ki lambi list uske paas thi jo zehar ka kaam karte the.

Teesra tha suicide note, jo ki is andaaz mein likhvana tha ke Ishita ne ye kaam isliye kiya ke vo apne kiye par sharminda hai aur apne baap se request kar rahi hai ke uski maut ke baad uski pregnancy ki baat ko uchhala na jaaye kyunki isse vo khud bhi maut ke baad badnaam hogi aur apne pariwar ko bhi badnaam karegi. Agar aisa ho gaya toh uske rasookh wala baap koi investigation nahi hone dega. Suicide ko normal maut bana diya jaayega aur koi investigation nahi hogi.

Aur Neeraj ki life phir normal ho jaayegi.

Yahi sab sochta vo apne office se nikla aur Chemistry lab pahuncha.

 

[vamp545]

Ek rack par bahut saari chemicals ki bottles rakhi hui thi par Neeraj janta tha ke usko kya chahiye. Usne ek bottle uthayi aur label padha.

WHITE ARSENIC (As4 O6) ** POISON

Thoda sa powder usne bottle se nikal kar ek kagaz mein daalkar pudiya se bana li aur apni jeb mein rakh liya. Vo janta tha ke jitna zehar vo le ja raha hai, itna ek Ishita ko kya, 20 logon ki jaan lene ke liye kaafi hai. Par vo sara ka sara hi Ishita ko khilane wala tha, just to be on the safer side.

Just to make sure ke saali zinda na bach jaaye, usne dil hi dil mein socha.

Kahin dil ke kisi kone mein usko Ishita par taras bhi aa raha tha. Aakhir vo bechari ek college jaane wali ladki thi aur har vahi arman tha jo ek aam ladki ke dil mein hota hai. College mein kisi handsome ladke se mile aur pyaar ho jaaye, phir unki shaadi ho, bachche hon ..... Us bechari ne galti ye ki ke pyaar galat insaan se kar bethi aur uski bahut bhaari keemat chukane wali thi.

"Nahi" Neeraj ne fauran apne khyaalon ka rukh badla aur apne dil ko mazboot kiya "Ye sab uski galti thi. Pehle zabardasti gale padi aur phir abortion nahi karaya. Galti uski hai, galti ki keemat bhi vo hi bharegi"

Zehar uske paas aa chuka tha. Ab Ishita ko suicide ke liye manana hai.

"Bevakoof hai saali" Usne dil mein socha "Bahut aasani se maan jaayegi"

Jaise vo khud apne dil ko tasalli de raha tha ke ye kaam bhi aasani se ho jaayega.
College mein kaam nipta kar vo apne ghar ke liye nikla. Raaste mein ek chemist ki dukaan par ruk kar kuchh khaali gelatin capsules le liye jinmein ke zehar bhar kar usne Ishita ko dena tha.

Par taqdeer ko shayad kuchh aur hi manzoor tha.

Jab vo apne ghar pahuncha toh shaam ke 7 baj rahe the. Sardiyon ka mausam tha isliye bhaari kohra har taraf phel chuka tha. Har taraf andhera tha aur log apne apne gharon mein ghus chuke the.
Uske ghar ke theek saamne Ishita ki gaadi parked thi.

Neeraj ko samajh nahi aaya ke kya kare. Vo bevakoof ladki khud uski biwi ke paas pahunch gayi thi aur ab tak toh sab bata diya hoga.

Use sab kuchh khatam hota dikhai de raha tha. Apni poori duniya khatam hoti dikhai de rahi thi. Uski samajh nahi aa raha tha ke ghar ne andar jaaye ya phir se apni gaadi mein bethka kahin door bhaag jaaye.

Neha se door.

Ishita se door.

Sabse door.

Saari museebaton se door.

Yun hi khade sochte hue usko 15 min beet gaye. Aam taur par jab vo ghar aata tha toh uski beti fauran bhaag kar bahar aa jaati thi par aaj aisa hua nahi.

Ghar mein use koi halchal dikhai nahi de rahi thi.

Darta hua vo dheeme kadmon se ghar ke darwaze tak pahuncha aur khol kar andar daakhil hua. Drawing room mein Ishita bethi hui thi.

"Ishita tum yahan?" Neeraj ne kaha aur ek nazar uspar uper se neeche tak daali. Vo poori khoon mein sani hui thi.

"Kya hua" Uske munh se apne aap hi nikal pada. Jawab mein Ishita ne anguli se kamre ke kone ki taraf ishara kiya.

Neeraj ki aankhen phati ki phati reh gayi. Kaleja munh ko aa gaya.

Kone mein Neha ki laash padi hui thi, lying in a pool of her own blood and piss.

Thodi hi door par uski 5 saal ki beti ki laash padi thi. Uski gardan aadhi kati hui thi, jaise kisi bakre ko halal kiya jaata hai.

Uski aankhon ke aage jaise andhera sa chhane laga.

"Maine kaha tha na ke main kuchh kar bethungi. Ab dekho na Neeraj, hamare paas koi chara bhi toh nahi tha. Kisi na kisi ko toh marna hi tha toh hamara bachcha kyun mare? Maina abortion kyun karaoon? Isliye maine saare raste hal kar diye. Tum hi batao, kya ye sahi hota ke ham apne pyaar ki nishani mere bachche ko maar dein? Tumne mujhe vo goliyaan khaane ko kaha tha par maine khaayi hi nahi. Kyun maarun main apne bachche ko? Sirf isliye ke log use naajayaz kehte hain?" Ishita keh rahi thi

 

[vamp545]

The end
Thanks for reading everyone..
@monimona_1990 @Chaya @LaaraibLikhaari

 

[Silent_lyf]

@vamp545