" یہ بس کہاں جائے گی؟ "
ایک شخص کسی بہانے سے فوج کی نوکری سے جان چھڑانے کی کوشش کر رہا تھا۔ اس نے کئی مہینے اس امر پر غور کیا۔ آخر کار اسے ایک تجویز سوجھی، وہ ڈاکٹر کے پاس پہنچا اور کہنے لگا؛
" ڈاکٹر صاحب میری نظر بہت ہی کمزور ہے بالکل کام نہیں کرتی، کچھ نظر نہیں آتا"۔
ڈاکٹر نے کہا؛
" اس کرسی پر بیٹھ جاؤ پھر تفصیل سے تمھاری بات سنوں گا "۔
" کون سی کرسی؟"
ڈاکٹر نے بازو سے پکڑ کر اسے کرسی پر بٹھا دیا اور پوچھا؛
" کیا تمھیں کرسی نظر نہیں آتی؟"
جواب آیا؛
" بالکل نہیں "
ڈاکٹر نے ایک دیوار پر لگے چارٹ کی طرف اشارہ کرتے ہوئے کہا؛
" اچھا اب پانچویں سطر پڑھو "
" کہاں سے پڑھوں؟ "
" چارٹ کی طرف دیکھو "
" کون سا چارٹ؟ "
" وہ چارٹ جو سامنے دیوار پر لٹک رہا ہے "
" لیکن دیوار کہاں ہے؟"
یہ سب دیکھ کر ڈاکٹر کو یقین ہو گیا کہ اس کی نظر واقعی بہت کمزور ہو چکی ہے اور اسے فوج سے ہمیشہ کے لئے چھٹی دیدی۔
جونہی وہ باہر نکلا اس نے زور سے قہقہ لگایا اور اسی خوشی میں وہ فلم دیکھنے چلا گیا، جب فلم ختم ہوئی تو وہ حیرت زدہ رہ گیا کہ وہی ڈاکٹر جس نے اسے ضعفِ بصارت کی وجہ سے فوج سے رخصت دی تھی اس کی ساتھ والی نشست پر بیٹھا تھا۔ اب ڈاکٹر نے اس کو پہچان لیا، لیکن اس نے کسی قسم کی گھبراہٹ کا اظہار کئے بغیر ڈاکٹر سے پوچھا؛
" کیوں صاحب "
" یہ بس کہاں جائے گی؟ "
