میرا متھا چُمیاں تینوں
اِنج حالوں بے حال نی مائے
بُھل گئی اپنی چال نی مائے
اونے پَھٹ میرے جُثے تے
جنے تیرے وال نی مائے
ھن تے کُجھ نظر نئیں آؤندا
ھور اِک سُورج بال نی مائے
میں دریاواں دا ہانی ساں
ترنے پے گئے کھال نی مائے
میرا متھا چُمیاں تینوں
ھو گئے چوّی سال نی مائے
ھر چھوٹی وڈی آفت وِچ
تُوں سیں ساڈی ڈھال نی مائے
جنہوں ملیے پھاہ لیندا اے
ھر بندہ کوئی جال نی مائے
افضل احسن لوھا سی پر
کھا گیا درد جنگال نی مائے
"افضل احسن رندھاوا"